黃偉民之癸巳蛇年前因後果(2) ── 蛇年吉凶
流年嘅運程書，深入民間，所以，人人都知道，嚟緊嘅新年，係蛇年。
咁，嚟緊嘅蛇年，對我，又是吉，是凶呢？
中國人，傳統以天干地支紀時，十個天干，配十二個地支。每一個地支，代表一個生肖，所以，新嘅一年，係癸巳年，即係蛇年。
十二個地支，子丑寅卯辰巳午未申酉戌亥。
子係鼠，丑係牛，寅係虎，卯係兔，辰係龍，巳係蛇，午係馬，未係羊，申係猴，酉係雞，戌係狗，亥係豬。
十二種生肖，代表十二個地支。
地支，有所謂嘅六冲同埋六合。
合，就係吉；冲，就係凶。
合，係互通有無，如魚得水。
冲，係立場相反，你死我亡。
地支嘅六合，鼠配牛，虎配豬，兔配狗，龍配雞，蛇配猴，馬配羊。
依六組生肖，性格特別夾，一齊特別好運，坊間合婚，都用依個地支六合為依歸。
合係好嘢，冲就係衰嘢嘞。
鼠冲馬，牛冲羊，虎冲猴，兔冲雞，龍冲狗，蛇冲豬。
依六組生肖，性格南轅北轍，開口夾著脷，合婚不宜，婚後一定吵吵鬧鬧，家無寧日。
根據依套地支六冲六合嘅原理，新嘅一年蛇年，最好運，應該係屬猴嘅人，最差嘅，應該係屬豬嘅人。因為蛇年，既係巳，巳申合，猴子合，但係巳亥冲，冲到豬嘞。
用十二地支嚟論吉凶，當然粗糙啦，將人分為十二類，每年都有同流年合嘅生肖，又有同流年冲嘅生肖，咁就論吉凶，聽見都兒戲，但難得又咁多人信喎。
出年，屬猴嘅係咪一定好，屬豬又一定大鑊呢？睇返今年吖，2012龍年，龍代表辰，辰戌冲，辰酉合，狗，就冲到應，邊個屬狗？大班屬狗，魔記屬狗，黃楚標屬狗，李國章屬狗，冲到應。咦，好似幾啱喎，咁，雞咪幾好。我屬雞，麻麻地至𡃓。
Search